Til Guðs

Til Guðs frá Jóhannesi.

Komdu blessaður drottinn minn sæll og blessaður

og þakka þér fyrir gamalt og gott

nú er orðið langt síðan við höfum sézt

við höfum einhvern veginn farizt á mis

Ég hef stundum verið að segja við sjálfan mig

guð minn guð minn hví hefur þú yfirgefið mig

það er skömm að því að hittast ekki oftar

eins og við vorum nú samrýmdir í gamla daga

Þú varst alltaf svo skemmtilegur á jólunum

mikið varstu nú almáttugur og algóður

og mikið hefurðu nú gengizt fyrir síðan

ég held þú sért orðinn ennþá karlalegri en ég

Er ekki voða erfitt að vera guð á svona tímum

hvað líður vísitölunni í himnaríki núna

tollir nokkur sála hjá þér þarna í sveitinni

fara ekki allir til fjandans í höfuðstaðinn

Skaparðu nokkuð merkilegt nú orðið

hefurðu nokkurn stundlegan frið fyrir mönnunum

eru þeir ekki alltaf að hóta þér verkfalli

eru þeir ekki alltaf að biðja þig um stríð

Nú erum við íslendingar hættir við byltinguna

við græddum svo mikið á síðasta stríði

heldurðu að þú gefir okkur nú ekki eitt enn

eða kannski þú sendir okkur nýjan frelsara

Skelfing leiðist mér hvað þú ert á hraðri ferð

því gaman hefði verið að spjalla lengur við þig

jæja drottinn minn vertu ævinlega margblessaður

og feginn vildi ég eiga þig að

Jóhannes úr Kötlum